29 փետրվարի  2008 թ. 03 (89)

 ԱՆՎՏԱՆԳՈՒԹՅԱՆ ՄՇԱԿՈՒՅԹԻ ՆԱԽԱՐԱՐՈՒԹՅՈՒՆ
կամ՝ որպեսզի կեցվածքը համապատասխանի էությանը 

Նորերս մի միջադեպ ուղղակի ապշեցրեց ինձ: Արցախցի նկարիչներից մեկը վրդովված պատմեց, որ մշակույթի նախարարին առաջարկել էր մեզ մոտ միջազգային ցուցահանդեսի անցկացման գաղափարը, որին ի պատասխան նախարարը սարսափահար զգուշացրել էր, որ առիթից օգտվելով երկիր կարող են ներթափանցել լրտեսներ: Այն տպավորությունն էր, որ ես խոսում էի ազգային անվտանգության նախարարի հետ՝ կիսեց տպավորությունները նկարիչը:

Իրականում սա պատահական միջադեպ չէր, պատահական չէր ոչ միայն նշյալ նախարարի պարագայում, այլև իշխանամերձ որոշակի խավերի հոգեբանությունում: Այդ շրջանակներում ընդունված է այն մտայնությունը, որ ով իշխանության մեջ ու կողքին չէ՝ պետության թշնամին է, մոռանալով, որ հանրային-պետական դաշտը ունի այնպիսի բաղկացուցիչ մասեր, ինչպիսին են իշխանությունը, ընդդիմությունը, հասարակական կազմակերպությունները, լրատվամիջոցները և այլն, որոնցից յուրաքանչյուրն ունի իր գործառույթները: Նշյալ հոգեբանությունը ոչ միայն անվերահսկելի է դարձնում իշխանությանը ու հարվածի տակ դնում ոչ իշխանական օղակներում գտնվող մեր քաղաքացիներին, այլև, որ ամենասարսափելին է, վերացնում բոլոր սկզբունքներն ու չափորոշիչները, ցանկացած քայլի իրավացիություն կախվածության մեջ դնելով կատարողից, ինչն էլ բերում է երկակի ստանդարտների, որոնցից դարեր ի վեր ինքներս ենք բողոքում:

Այսպես, միջազգային և հատկապես բրիտանական կազմակերպությունների հետ համագործակցող արցախյան հասարակական կազմակերպությունների (ՀԿ) շուրջ ձևավորվում է կասկածների ու լրտեսության մեջ մեղադրանքների մթնոլորտ, ինչը, սակայն, չի խանգարում, որ ԼՂՀ նախագահ Բակո Սահակյանը «Երախտագիտություն» մեդալ շնորհի «Birth Link» բրիտանական հումանիտար կազմակերպության անդամ Քեթթի Մելլորին: Ինչը չի խանգարում, որ իշխանությունների ըստ ամենայնի աջակցությամբ ազատ գործի «Հալո տրաստ» բրիտանական ընկերությունը: Էլ չենք խոսում մեր երկրի բարեկամ ու մեր իշխանությունների հետ ամենասերտ շփումների մեջ գտնվող՝ Մեծ Բրիտանիայի Լորդերի պալատի փոխխոսնակ, բարոնուհի Քերոլայն Քոքսի մասին: Նույնը նաև Հայաստանում է: Բրիտանական կազմակերպությունների հետ համագործակցող ՀԿ-ների նկատմամբ անվստահության մթնոլորտն ամենևին էլ չխանգարեց, որ նախագահական ընտրություններում պետական մեքենան այնքան թմբկահարի բրիտանական «Պոպուլոս» սոցիոլոգիական կազմակերպության գործունեությունը, որ նրա ղեկավար Էնդրյու Կուպերն այդ ընթացքում ուղղակի շոու-աստղ դառնա, հընթացս էլ՝ հայ ժողովրդի մեծ բարեկամ:

Կամ մեկ այլ օրինակ: Երբ ՀԿ-ներն են տարբեր միջազգային ծրագրերի շրջանակներում շփվում իրենց ադրբեջանցի կոլեգաների հետ, դա մատուցվում է կասկածանքի շեշտադրումներով, ինչը չի խանգարում ադրբեջանական պատվիրակության մուտքն Արցախ ապահովելու համար ականազերծել առաջին գծի մի հատված: Չի խանգարում, քանի որ դա իշխանությունն է անում: Այսինքն, այն, ինչ իշխանությունն է անում կամ իշխանությանը ձեռնտու է՝ լավ է, իսկ մնացյալ ամեն ինչ՝ կասկածելի: Ահա և ամբողջ գաղտնիքը:

Իսկ լրտեսության առումով հարկ է ընդգծել մի քանի կարևոր հանգամանք: Նախ՝ որպես կանոն, նկատի է առնվում տեղեկատվության արտահոսքի վտանգը: Մինչդեռ, ինչպես հայտնի է, պետական գաղտնիքի կրողները պետական պաշտոնյաներն են, և արտահոսքը միայն այնտեղից է հնարավոր: Ոչ մի ՀԿ չգիտի և երբևէ հետաքրքրված չկա, թե պատերազմի բռնկման դեպքում որքան կհերիքի մեր ունեցած փամփուշտը կամ նման այլ բաներ: Հասարակական սեկտորում գաղտնիքների կրողներ չկան, ըստ այդմ էլ՝ տեղեկատվական արտահոսքի վտանգն էլ չկա: Տեսականորեն արտահոսք կարող է լինել պետական մարմիններից, որոնք, այդուամենայնիվ, չեն խորշում միջազգային կազմակերպությունների հետ համագործակցությունից: Հայաստանը որպես ճանաչված պետություն զանազան վարկեր ու դրամաշնորհներ է ստանում Համաշխարհային բանկից, Արժույթի միջազգային հիմնադրամից և այլ տեղերից, իսկ մեր իշխանություններն էլ մշտապես բողոքում են, որ զրկված են նման հնարավորությունից, այսինքն՝ մեծ հաճույքով իրենք էլ կօգտվեին դրանցից: Մեր ընդդիմախոսների տրամաբանությամբ առաջնորդվելու դեպքում պիտի՞, արդյոք, եզրակացնել, որ ՀՀ իշխանությունները տեղեկատվական արտահոսքի պոտենցիալ խողովակներ են, կամ, որ այդպիսին են տենչում լինել ԼՂՀ իշխանությունները: Իհարկե՝ ոչ:

Երկրորդ հանգամանքը: Հարկ է հասկանալ, որ մեր նորանկախ երկրի միջազգային ճանաչման բացակայության պայմաններում հազվադեպ են շփումները միջազգային կառույցների հետ, ահա թե ինչու հասարակական խողովակներով նման շփումներն ուղղակի մեծ դեր են խաղում և նպաստում նույն այդ միջազգային ճանաչմանը: Այսքանը միանշանակ հասկանում է իշխանությունը, և պատահական չէ, որ նորերս էլ մեզ մոտ ԱԳՆ-ին առնթեր ստեղծվեց Միջազգային համագործակցության պետական կենտրոն, որը պիտի հիմնականում զբաղվի տեղական ՀԿ-ների համար ֆանդրայզինգով, այսինքն՝ դրամաշնորհային միջոցների ներգրավմամբ միջազգային դոնոր-կազմակերպություններից:

Եւ երրորդ հանգամանքը: «Կասկածամիտների» կեցվածքը հակասում է պետական դիրքորոշմանը, համենայնդեպս՝ հրապարակային պետական դիրքորոշմանը: Այդ թվում՝ նաև հայ-ադրբեջանական շփումների պարագայում: Այսպես, Ղարաբաղյան հիմնախնդրի քաղաքական կարգավորման գործում երկու հայկական պետությունների և Ադրբեջանի դիրքորոշումները բևեռային են համագործակցության հարցում: Ադրբեջանը գտնում է, որ հակամարտող կողմերի միջև շփումներ կարող են լինել հակամարտության վերջնական կարգավորումից հետո միայն, իսկ հայկական կողմերը գտնում են, որ հենց նման շփումները կարող են նպաստել կարգավորմանը: Հայկական կողմերի դիրքորոշումը մտածված, քաղաքակիրթ ու դիվանագիտորեն ճկուն է, ինչն ըստ արժանվույն գնահատվում է միջազգային հանրության կողմից: Այս պարագայում նույն այդ շփումները կասկածի տակ դնողները պիտի հասկանան, որ իրենք պետական դիրքորոշումն են ոտնահարում: Ուրիշ բան որ չլինի՝ երկրի համար շատ ավելի օգտակար է միջազգային ատյաններում ընդդիմախոսների հետ բանավեճում Արցախի դատը պաշտպանելը, քան տանը նստելն  ու «հեռակա» համարձակությամբ «Հեյդար բաբային» փնովելը: Ամենակարևորը՝ մենք պիտի հասկանանք, որ հնարավոր չէ երկիրը մեկուսացման տանելով՝ միջազգային ճանաչում ակնկալել:

Ինչ վերաբերում է մշակույթի նախարարությանը, ապա ներկայիս նախարարը կասկածանքի իր հեղինակած «դպրոցը» բերել է նաև այստեղ: Նկարչի հետ պատմությունը միակը չէ: Մի միջոցառման հրավիրյալների ցուցակից նա ջնջել է տարածաշրջանային համագործակցության ծրագրերում ներգրավված մի կազմակերպության երկու անդամների անունները,  պատճառաբանելով, որ նրանք հակապետական գործունեությամբ են զբաղված: Եւ ապա այնպիսի մթնոլորտ է ստեղծել, որ այդ մասին բարձրաձայնած իր աշխատակիցը ստիպված է եղել դիմում գրել ազատման մասին: Մեկ այլ դեպքում նույն ոլորտի հիմնարկներից մեկում աշխատող երիտասարդներից մեկը միջազգային մի հանդիպման մասնակցելուց հետո նույնպես ստիպված է եղել հեռանալ աշխատանքից:

Մշակույթի նախարարությունն այն գերատեսչությունը չէ, որ պիտի զբաղվի լրտեսորսությամբ, իսկ եթե մարդ նման հակումներ ունի, ապա դրա համար այլ ոլորտներ կան: Ի վերջո՝ ամեն մարդ պիտի աշխատի ըստ նախասիրությունների և ունակությունների: Այսքանից հետո մնում է մխիթարվել նրանով, որ սպորտը անջատել են այս նախարարությունից: Թե չէ` պատկերացրեք, որ ֆուտբոլի մեր հավաքականը մի գեղեցիկ օր պիտի հանդիպի Բրազիլիայի հավաքականի հետ, բայց նախարարն արգելում է այն, քանի որ երկիր կարող է ներթափանցել առնվազը 11 լրտես:

Կատակը` մի կողմ: Նման հոգեբանության տեր պաշտոնյաները պիտի հասկանան, որ իրենց գործունեությունը հակասում է պետական դիրքորոշմանը, իսկ բարձրագույն իշխանությունն էլ պիտի նկատի, որ ենթակաների գործելակերպը կասկածի տակ է դնում իրենց իսկ վարած քաղաքականությունը, իրենց իսկ անկեղծությունը:

Զավեշտը կայանում է նրանում, որ երբ «կասկածամիտների» հետ փորձում ես անկեղծ զրույցի բռնվել, նրանք հրաժարվում են և ասում, որ նման բաներ չեն ասել ու չեն արել: Կամա թե ակամա հիշում ես Պարույր Սևակի հետ կապված հայտնի պատմությունը, երբ նա «Գրական թերթի» խմբագրից պահանջում էր անպայման տպագրել իբր թե իր գրագող լինելու մասին անստորագիր հոդվածը, որպեսզի կարողանա պատասխանել և զրույցներին վերջ դնել:

Նույն մտահոգությամբ ես մշակույթի նախարարին հրավիրում եմ հեռուստաբանավեճի, ակնկալելով հանրային հեռուստատեսության աջակցությունը:

ԳԵՂԱՄ ԲԱՂԴԱՍԱՐՅԱՆ

լրահոս

ՀԱՆԴԻՊՈՒՄ` ԵՐԵՎԱՆՈՒՄ 

Փետրվարի 26-ին Երեւանում տեղի ունեցավ ԼՂՀ Նախագահ Բակո Սահակյանի հանդիպումը ԵԱՀԿ գործող նախագահ, Ֆինլանդիայի ԱԳ նախարար Իլկա Կաներվայի հետ:  Բանակցությունների ընթացքում քննարկվեց ղարաբաղյան հակամարտության կարգավորման գործընթացին վերաբերող հարցերի լայն շրջանակ:

Զրուցակիցներն ընդգծեցին, որ հիմնահարցի խաղաղ ճանապարհով կարգավորումն այլընտրանք չունի: Այս առումով կողմերը նշեցին, որ ռազմատենչ հայտարարությունները բացասական ազդեցություն են թողնում խաղաղ գործընթացի վրա:

Նախագահ Բակո Սահակյանը, ներկայացնելով պաշտոնական Ստեփանակերտի դիրքորոշումը, նշել է, որ անհրաժեշտ է վերականգնել ԼՂՀ կարգավիճակը` որպես բանակցային գործընթացի լիիրավ կողմի:

Հանդիպմանը մասնակցել են ԼՂՀ արտաքին գործերի նախարար Գեորգի Պետրոսյանը, ԵԱՀԿ խորհրդարանական վեհաժողովի նախագահ Գորան Լենմարկերը, ԵԱՀԿ գործող նախագահի անձնական ներկայացուցիչ Անջեյ Կասպշիկը:

Բանակցություններից հետո տեղի ունեցավ ԼՂՀ Նախագահ Բակո Սահակյանի եւ ԵԱՀԿ գործող նախագահ Իլկա Կաներվայի համատեղ մամուլի ասուլիսը:

 ԼՂՀ ՆԱԽԱԳԱՀԻ ԱՇԽԱՏԱԿԱԶՄԻ ՏԵՂԵԿԱՏՎՈՒԹՅԱՆ ԳԼԽԱՎՈՐ ՎԱՐՉՈՒԹՅՈՒՆ 

ԿՈՉ ՀՀ ԵՐԿՐԱՊԱՀ ԿԱՄԱՎՈՐԱԿԱՆՆԵՐԻ ՄԻՈՒԹՅԱՆ ԱՆԴԱՄՆԵՐԻՆ

Սիրելի  նախկին ազատամարտիկներ, երկրապահի իմ զինակիր ընկերներ:

Դարերի ընթացքում ճակատագիրը հայ ժողովրդին բազում փորձությունների է ենթարկել,  որոնց կարողացել ենք դիմակայել միասնականության ու ապագայի հանդեպ  ունեցած խորը հավատի շնորհիվ:  Ղարաբաղյան  գոյապայքարի տարիներին մեր միակամությունն առավելագույնս դրսեւորվեց՝ հաստատելով այն անբեկանելի ճշմարտությունը, որ աշխարհում ոչ մի ուժ չի կարող հաղթել միասնության դրոշի ներքո համախմբված ազգին:

... Այսօր ճակատագիրը դարձյալ մեզ փորձության է մղում: Հետընտրական նոր զարգացումները Մայր Հայաստանում, երկրում ստեղծված ներքաղաքական լարվածությունը լուրջ մտահոգությունների տեղիք են տալիս առաջին հերթին մեր միասնականությունը ճեղքվելու ծանր հեռանկարով: Բանը հասել է նույնիսկ ազգը աշխարհագրորեն տարանջատելուն՝ միտումնավոր ղարաբաղցիներին առանձնազատելու ստորացուցիչ ձեւերով, եւ որի իրական նպատակը մեր ժողովրդին երկփեղկելն է: Միակամությունը մեր գոյապայքարի ամենամեծ նվաճումներից է, մեր ազգային հարստությունը, որը կորցնելն աղետալի կլինի բոլորիս համար: Գոյամարտի ծանր տարիներին, երբ ուս-ուսի տված կենաց ու մահու կռիվ էինք մղում թշնամու դեմ՝ փրկելու հայության սրբավայր դարձած Արցախը, մենք վեր էինք քաղաքական ամբիցիաներից, անձնական շահագրգռություններից ու տարընկալումներից: Մեզ առաջնորդողը համազգային կազմակերպվածությունն էր, իրար նկատմամբ պատկառանքն ու վստահությունը, եւ պետք է հիմա էլ շարունակենք մնալ այդպիսին՝ ստեղծված իրավիճակում լինելով զուսպ  ու հավասարակշիռ, զերծ մնալով ազգային անվտանգության խնդիրներին զգայական մոտեցումներից եւ զգուշանալով օտար ազդեցություններից: 

... Իբրեւ պատերազմի բովով անցած այրեր՝ քաջ գիտենք, որ արտաքին թշնամու նման հավասարաչափ  նենգ ու վտանգավոր են  կեղծ հայրենապաշտների սադրանքը, սին գայթակղությունները,  հոգու թուլությունը, ուստի  այս վճռական պահին հարկ է կուռ պահել մեր շարքերը, որպեսզի տրոհման որդը չներթափանցի մեր մեջ:

Մեր միասնականության տրոհմամբ՝ վաղը կկանգնենք անդառնալի կորուստների ու հիասթափությունների անդունդի առջեւ, որի համար պատմությունը մեզ չի ների:

 Հավատով ու լավատեսությամբ՝

 Արցախի հերոս,
«Ոսկե արծիվ» շքանշանի ասպետ
ԱՐՇԱՎԻՐ ՂԱՐԱՄՅԱՆ
(տպագրվում է մասնակի կրճատումներով)

«ԳԼԽԱՑԱՎԱՆՔԻՑ» ԱԶԱՏՎԵՑԻՆ 

«Դեմո»-ն շարունակում է հետևել ԱրՊՀ հրատարակչության վարչի պաշտոնում Գագիկ Բաղունցի վերականգնման մասին դատական գործի զարգացումներին: Ինչպես արդեն տեղեկացրել էինք՝ դեկտեմբերի 3-ին առաջին ատյանի դատարանը որոշում էր կայացրել Գ.Բաղունցի օգտին: Սակայն համալսարանի ռեկտորը դատավճիռը բողոքարկել էր: Փետրվարի 15-ին քննելով գործը՝ ԼՂՀ Գերագույն դատարանը ևս վճիռ է կայացրել ազատման հրամանի անօրինականության և Գ.Բաղունցին իր պաշտոնում վերականգնման մասին:

Համալսարանի ղեկավարությունը յուրօրինակ ձևով է արձագանքել այս վճռին, որոշում ընդունելով լուծարել նաև հրատարակչությունը...

Սեփ. լրատվություն

ՊԱՏԱՍԽԱՆԻ ԻՐԱՎՈՒՆՔՈՎ

Հարգելի խմբագրություն

Ի պատասխան  Ձեր թերթի թիվ 02 /15.02.2008թ./ համարում  տպագրված` Ստեփանակերտի քաղբնակիչ Շողեր Աբրահամյանի  նամակի, որում հեղինակը  ԼՂՀ դատախազությանը մեղադրում է իր դստեր` Իննա Աբրահամյանի մահվան կապակցությամբ  «ոչ արդար հետաքննություն» իրականացնելու կապակցությամբ, հայտնում ենք հետեւյալը:

Նամակում արդեն նշված փաստի առթիվ ԼՂՀ դատախազությունում  2006 թվականի դեկտեմբերի 16-ին հարուցվել է քրեական գործ Քրեական օրենսգրքի 130-րդ հոդվածի 2-րդ մասի հատկանիշներով, այն է` բժշկական օգնություն եւ սպասարկում իրականացնողների կողմից մասնագիտական պարտականությունները  չկատարելը կամ ոչ պատշաճ կատարելը:                                                       

Նախաքննության ընթացքում անհրաժեշտություն էր առաջացել երեք անգամ նշանակելու հաձնաժողովային դատաբժշկական փորձաքննություն: Այսպես, կատարված առաջնային փորձաքննության  եզրակացությունից հետեւում է, որ Իննա Աբրահամյանի  մահվան պատճառ հանդիսացել են ԼՂՀ առողջապահության նախարարության «Մոր եւ մանկան առողջության պահպանման կենտրոն» ՓԲԸ բժիշկների կողմից թույլ տրված խախտումները, սակայն եզրակացության մեջ չի նշվել, թե կոնկրետ  որ բժշկի կողմից թույլ տրված խախտումն է հանդիսացել Ի. Աբրահամյանի մահվան անմիջական պատճառը:

Լրացուցիչ նշանակված դատաբժշկական փորձաքննության եզրակացության համաձայն` Ի. Աբրահամյանի մահվան պատճառ է նշվել վերոհիշյալ բուժհիմնարկի ծննդաբերական բաժանմունքի վարիչի կողմից թույլ տրված խախտումը:

Նախաքննության մարմինը հաշվի առնելով առաջնային եւ լրացուցիչ  հանձնաժողովային  դատաբժշկական փորձաքննությունների  եզրակացությունների հակասությունները, ինչպես նաեւ բավարարելով  տուժողի ներկայացուցչի միջնորդությունները կրկնակի փորձաքննություն նշանակելու մասին, նշանակել է կրկնակի  հանձնաժողովային դատաբժշկական փորձաքննություն ՀՀ ԳԱԱ «Փորձաքննությունների ազգային բյուրո» ՊՈԱԿ-ում, որի բարձրակարգ մասնագետների տված եզրակացության համաձայն` բժիշկների կողմից թույլ տրված որոշակի խախտումները պատճառական կապի մեջ չեն գտնվում Իննա Աբրահամյանի մահվան հետ:

Նախաքննության մարմնի կողմից գործի քննության ընթացքում, այսպիսով, կատարվել են հնարավոր բոլոր քննչական այն գործողությունները, որոնք ուղղված են գործի բազմակողմանիությունը, լրիվությունը եւ օբյեկտիվությունն ապահովելուն: Սակայն նոր ապացույցներ ձեռք բերելու բոլոր հնարավորությունները սպառված  էին, իսկ դատաբժշկական հանձնաժողովային փորձաքննությունների իրարամերժ եզրակացությունների պարագայում` ձեռք բերված ապացույցները  անձին քրեական պատասխանատվության ենթարկելու համար համարվում են անբավարար:

Հիմք ընդունելով նշվածը եւ  առաջնորդվելով ԼՂՀ  Քրեական  դատավարության օրենսգրքի 35-րդ հոդվածի 2-րդ մասով, այն է` քրեական հետապնդումը  ենթակա է դադարեցման, իսկ գործի վարույթը ենթակա է կարճման` կատարված հանցագործությանը կասկածյալի կամ մեղադրյալի մասնակցությունն ապացուցված չլինելու  արդյունքում, եթե սպառված են նոր ապացույցներ  ձեռք բերելու բոլոր հնարավորությունները, հարուցված քրեական գործը կարճվել է:  Միեւնույն ժամանակ, բժիշկների կողմից  թույլ տրված խախտումների վերաբերյալ դատախազության կողմից միջնորդագիր է ներկայացվել ԼՂՀ առողջապահության նախարարին:

Ինչ մնում է նամակի հեղինակի այն պնդմանը, թե գործող Գլխավոր դատախազը ընդհանրապես չի լսել իրեն եւ դուրս է հրավիրել աշխատասենյակից, ապա  տեղեկացնում ենք, որ ԼՂՀ Գլխավոր դատախազը ընդունված կարգով ընդունել է քաղաքացի Շողեր Աբրահամյանին եւ նրան մասնավորաբար բացատրել քրգործը կարճելու բուն հիմքերը: Չբավարարվելով այդ բացատրությամբ, Շ. Աբրահամյանն անցել է սադրանքի, ինչն էլ պատճառ է հանդիսացել նրան Գլխավոր  դատախազի աշխատասենյակից դուրս հրավիրելու:

 ԼՂՀ  ԴԱՏԱԽԱԶՈՒԹՅԱՆ  ՄԱՄՈՒԼԻ  ԾԱՌԱՅՈՒԹՅՈՒՆ
27.02.2007թ.

ՄԵԿ ՆԱԽԱԴԱՍՈՒԹՅԱՄԲ

Վերջերս հրավիրած խորհրդակցության ժամանակ ԼՂՀ նախագահ Բակո Սահակյանն ընդգծելով, որ բնակչության շրջանում իշխանության որոշ օղակների աշխատանքը դժգոհություն է առաջացնում, իշխանության թեւերին կարգադրել է 3 ամսվա ընթացքում ուսումնասիրել եւ ներկայացնել համապատասխան առաջարկություններ՝ պետական կառավարման համակարգի գործունեության արդյունավետության բարձրացման վերաբերյալ:

***

ԼՂՀ կառավարության որոշմամբ, «Մետաքս» ՓԲԸ-ին (նախկին «Ղարմետաքսկոմբինատ») ազատել են հաշվարկված տույժերից եւ տուգանքներից, որոնք կազմում են 23 միլիոն 507 հազար 400 դրամ:

***Կառավարության պահուստային ֆոնդից 1 397 000 դրամ կհատկացվի առողջապահության նախարարությանը՝ «Բերձորի ատամնաբուժարան» պետական ոչ առեւտրային կազմակերպության նոր շենքը կահույքով ապահովելու համար:

***
Առողջապահության նախարարության կողմից ձեռք բերված ԳԱԶ 32214-432 մակնիշի երկու ավտոմեքենաները անվարձահատույց կտրամադրվեն նախարարության շտապ բժշկական օգնության կայանին, իսկ ՈՒԱԶ 396294-016 մակնիշի ավտոմեքենան՝ Քաշաթաղի շրջանային բուժմիավորմանը:

***

Հանրապետության «փոքր» օբյեկտների տարածքի մեկ քառակուսի մետրի նոր արժեք է հաստատվել, ըստ որի՝ մարտի 1-ից մեկ քառ. մետրի արժեքը բնակելի եւ այլ շենքերի բացվածքներում կկազմի 10 հազար դրամ /նախկին 10 դոլարի փոխարեն/, իսկ  առանձնացված շենքերում՝ 20 հազար դրամ /նախկին 20 դոլարի փոխարեն/:

***

Կառավարության նիստում առաջարկվել է լրացում կատարել «Ընդերքն ուսումնասիրության եւ օգտակար հանածոների արդյունահանման նպատակով տրամադրելու (կոնցեսիայի) մասին» ԼՂՀ օրենքում, որի համաձայն ներկա անցումային շրջանում հանքային իրավունքներ կտրամադրվեն ընդերքի վերաբերյալ կանխատեսումային տեղեկանքի հիման վրա, իսկ հանքարդյունահանման համար հանրապետությունում տրված 42 լիցենզիայից միայն մեկն է տրամադրվել հանքապաշարները հաստատող փաստաթղթով /«Բեյզ Մեթըլս» ընկերությանը/:

***

ԼՂՀ-ում բնակարանների սեփականաշնորհման ժամկետը կառավարության առաջարկությամբ կերկարաձգվի մինչեւ 2009 թվականի վերջը, իսկ, ընդհանուր առմամբ, չսեփականաշնորհված է հանրապետության բնակֆոնդի մոտ 8 տոկոսը:

***

Այսուհետ ԼՂՀ քաղաքացիները ցանկության դեպքում կարող են անձնագրում գրանցումներ ստանալ ամուսնության եւ ամուսնալուծության վերաբերյալ:

***

Կառավարության նիստում հաստատվել են ԼՂՀ ՊԲ-ի, Շուշիի ազատագրման 16-րդ տարեդարձի եւ Հաղթանակի օրվա տոնակատարության կազմակերպման կառավարական հանձնաժողովի կազմը (նախագահ՝ ԼՂՀ պաշտպանության նախարար Մովսես Հակոբյան) եւ միջոցառումների ծրագիրը:

***

Գործադիրը հաստատել է պետբյուջեի միջոցներով իրականացվող հեռուստառադիոհաղորդումների հեռարձակման պետական պատվերը, որը, մասնավորապես, կապահովի «ԱՀ», Հայաստանի «Հ1», ՌԴ «1», «Ռոսիա» եւ հայկական ու ռուսական մի շարք ռադիո եւ հեռուստատեսային ծրագրերի հեռարձակումը, ինչի համար կհատկացվի ավելի քան 167 մլն դրամ:

ԼՂՀ ՆԱԽԱԳԱՀՆ ԱՆՀԱՍԱՆԵԼԻ՞ Է
Կամ ` մի չկայացած

 հարցազրույցի պատմություն 

Ս.թ. հունվարի 15-ին պաշտոնական նամակով դիմել էինք ԼՂՀ նախագահ Բակո Սահակյանին՝ «Դեմո» հանրային թերթին բացառիկ հարցազրույցի խնդրանքով, ակնկալելով մեր հարցերի պատասխանները ստանալ 15-օրվա ընթացքում, որպեսզի տպագրեինք մեր թերթի հունվարի 31-ի համարում: Պաշտոնական նամակով դիմել էինք նաև ԼՂՀ նախագահի աշխատակազմի տեղեկատվության գլխավոր վարչության պետ Դավիթ Բաբայանին, խնդրելով նրա աջակցությունը հարցազրույցի կայացման հարցում: Այնուհետև բանակցություններն ընթանում էին հենց Դ.Բաբայանի հետ, որն էլ պատրաստակամ ու ճշտապահորեն արձագանքում էր մեր զանգերին ու նամակներին:

Սակայն արդյունք, միևնույն է, չեղավ: Պատասխանները չստացանք մինչև հունվարի 31-ը, նույնիսկ հարցազրույցի առանձնակի կարևորությունն ըստ արժանվույն գնահատելով՝ երկու օր ուշացրինք թերթի հերթական համարի լույսընծայումը, բայց դարձյալ ապարդյուն: Մեր հարցերի պատասխանները չստացանք նաև թերթի փետրվարի 15-ի համարում զետեղելու համար: Այս ամբողջ ընթացքում Դ.Բաբայանը հավաստիացնում էր, որ նախագահը չի մերժել հարցազրույցի խնդրանքը: Մենք հիմք չունենք կասկածելու Դ.Բաբայանի անկեղծությանը, բայց նաև ստիպված ենք փաստել, որ պատասխանները չստացանք նաև մեր թերթի փետրվարի 29-ի համարում զետեղելու համար:

Մեկուկես ամիս սպասելուց հետո ստիպված ենք փաստել մի տխուր իրողության առկայությունը, որ եղել է երեկ և շարունակվում է այսօր: Դա այն է, որ ԼՂՀ նախագահն անհասանելի է, կամ հասանելի է ոչ բոլորին: Ցավոք սրտի, դեռ շարունակվում է հանրությունը յուրայինների և ոչ յուրայինների բաժանելու միտումը: Բայց դա մեդալի մի երեսն է ընդամենը, քանի որ, հանուն արդարության, պիտի ասել, որ նախագահը շփումների հարցում առատաձեռն չէ նաեւ «յուրային» լրատվամիջոցների հետ: Ըստ երևույթին, պրոբլեմն ավելի խորն ու ավելի ավանդական է:

Ամենայն հարգանքով վերաբերվելով նորանկախ երկրում նախագահական ինստիտուտին և ըմբռնումով մոտենալով երկրի ղեկավարի աշխատանքի ծանրաբեռնվածությանը, այնուհանդերձ համոզված ենք, որ լրատվամիջոցների հետ շփումները ևս պիտի կազմեն այդ ծանրաբեռնվածության կարևոր ու բաղկացուցիչ մասերից մեկը: Այս ճշմարտությունը շատուշատ դժվար է արմատավորվում մեզ մոտ:

ԼՂՀ նոր նախագահը քանիցս հայտարարել է ժողովրդին մոտ լինելու իր պատրաստակամության մասին: Սակայն նորից հեծանիվ հնարելու կարիք չկա՝ ժողովրդին ավելի մոտ լինելու ամենաարդյունավետ ձեւերից մեկը լրագրողներին ու լրատվամիջոցներին մոտ լինելն է: Որովհետեւ ցանկացած պաշտոնյա օրական կարող է ընդունել, ասենք թե, մի քանի տասնյակ մարդ, բայց ահա լրագրողների օգնությամբ կարող է իր խոսքը հասցնել մի քանի տասնյակ հազար մարդկանց: Լինել ժողովրդին մոտ ու լրատվամիջոցներից հեռու՝ պարզապես անհնար է:

Այս պարագայում հատկապես կարևոր են առանցքային լրատվամիջոցների հետ շփումները: Իսկ որ «Դեմո»-ն մեր երկրի առանցքային լրատվամիջոցներից մեկն է՝ կարծես թե ոչ ոքի կողմից չի վիճարկվում:

 Համագործակցության ակնկալիքով՝«ԴԵՄՈ» ՀԱՆՐԱՅԻՆ ԹԵՐԹԻ ԽՄԲԱԳՐԱԿԱԶՄ

ԳՆԱՀԱՏԱԿԱՆ ՏԱԼՈՒ ԺԱՄԱՆԱԿԸ ԵԿԵ՞Լ Է

Վերջին տարիների պրակտիկայում երեւի առաջին անգամն է, երբ հայտարարվում է այս կամ այն հիմնարկի ղեկավարին աշխատանքից ազատելու պատճառի մասին: Իսկ դա եղավ վերջերս՝ առողջապահության նախարար Արմեն Խաչատրյանի հետ հարցազրույցի ժամանակ, երբ նա սկսեց խոսել առողջապահության ոլորտի ներկայացուցիչների գործունեության թափանցիկության ապահովման անհրաժեշտության մասին: Պատասխանելով «ինչո՞ւ են ազատվել բժշկական մի շարք հիմնարկների ղեկավարները» հարցին, նա ասաց. «Ոչ լիարժեք աշխատանքի եւ նախկինում թույլ տված բացթողումների համար»: Նախարարը մեր զրույցի ժամանակ նաեւ շեշտեց, որ «ժամանակն է իրար ասել բոլոր սխալները, մաքրվել ու սկսել նորմալ աշխատել»:

Հիշողությանս մեջ միակ դեպքն է, երբ պաշտոնյան խոսում է թափանցիկության անհրաժեշտության մասին ու անում դրան հարիր հայտարարություն ու կոնկրետ քայլեր: Համենայնդեպս, դրանից գոհ կլինեն այն բազմաթիվ քաղաքացիները, որոնք վերջին տարիներին Ղարաբաղում կատարվող կադրային փոփոխություններից ու տեղափոխություններից այդպես էլ չհասկացան, թե ում ինչի համար են հանում կամ տեղափոխում, եւ ով է լավ կամ վատ աշխատողը: Այնպիսի տպավորություն է ստեղծվում, թե բոլորն էլ լավ են աշխատում, ուղղակի նրանց պաշտոնները պարբերաբար փոխել է պետք:

Իսկ առողջապահության նախարարի այս գնահատականից կարելի է եզրակացնել, որ ոլորտի նախկին որոշ աշխատողներ չեն փայլել իրենց աշխատանքով եւ բացթողումներ են ունեցել, ուստի ժամանակն է, որ նրանք իրենց տեղը զիջեն ուրիշներին:

Իհարկե, այս եւ մյուս ոլորտների մի շարք ղեկավարների եւ աշխատողների ոչ լիարժեք գործունեության մասին գիտեն նաեւ մեր քաղաքացիներից շատերը: Հենց դրանով են պայմանավորված հասարակության շրջանում գոյություն ունեցող տարբեր դժգոհությունները եւ բողոքները: Իսկ բողոքները տարբեր ոլորտներից են՝ առողջապահություն, կրթություն, մշակույթ, հարկային, դատական մարմիններ եւ այլն: Մարդիկ դժգոհ են ոչ միայն տարվող աշխատանքներից, այլ նաեւ բնակիչների հանդեպ վերաբերմունքից: Իսկ այն, որ տարբեր ոլորտներում բնակիչների հանդեպ վերաբերմունքը գտնվում է շատ ցածր մակարդակի վրա, դա խոստովանում են նաեւ այս կամ այն ոլորտի ղեկավարները:

Հասարակության շրջանում տեղ գտած բողոքներն էին օրերս նախագահ Բակո Սահակյանի մոտ խորհրդակցություն հրավիրելու պատճառը: Խորհրդակցության ընթացքում, որին ներկա էին օրենսդիր եւ գործադիր մարմինների ներկայացուցիչներ, նախագահը ընդգծել է, որ բնակչության շրջանում իշխանության որոշ օղակների աշխատանքը դժգոհություն է առաջացնում: Գնահատելով առկա վիճակը, նա անթույլատրելի է համարել ավելորդ բյուրոկրատացման միտումները, ինչպես նաեւ դեկլարատիվ բնույթ կրող աշխատանքը:

Դրանից հետո խիստ գնահատական է հնչեցրել նաեւ վարչապետ Արա Հարությունյանը՝ կառավարության օրերս կայացած նիստի ժամանակ: Նա կառավարության անդամներին ներկայացնելով նախագահի պետական կառավարման համակարգի գործունեության արդյունավետության բարձրացման մասին կարգադրությունը, շեշտել է, որ պետական համակարգը ուռճացված է եւ հնարավոր է օպտիմալացմանն ուղղված քայլերի ձեռնարկում: Նա խոսել է նաեւ պետական համակարգում առկա մեքենաների շուկայի խիստ հագեցվածության, այդ մեքենաների՝ շատ անգամ պաշտոնյաների կողմից անձնական նպատակների համար օգտագործման, պետական միջոցների ոչ արդյունավետ ու ոչ նպատակային ծախսման մասին: Վարչապետը միաժամանակ ընդգծել է, որ կան նաեւ այդ միջոցների ոչ միայն փոշիացման, այլեւ յուրացման դեպքեր:

Գուցե այս ամենը սկիզբ դնի հասարակությանը տեղյակ պահելու պարտավորվածությանը եւ առկա զարգացումներին գնահատական տալու գործընթացին: Չէ՞ որ անհնար է անզեն աչքով էլ տեսանելի բաները թաքցնելը, նամանավանդ մեր այս փոքրիկ երկրում, որտեղ, ինչպես ասում են՝ մի բուռ հայ ենք... Էլ ի՞նչ իմաստ ունի ակնհայտը շղարշելու:

Անահիտ ԴԱՆԻԵԼՅԱՆ

ԴԵՊԻ ՈՒ՞Ր Է ՏԱՆՈՒՄ ՍՏԱՏՈՒՍ-ՔՎՈՅԻՑ ՄԵԿՆԱՐԿՈՂ ՃԱՆԱՊԱՐՀԸ

 Հայաստանն ու Ադրբեջանը համաձայնեցրել են ապառազմականացման, միջազգային խաղաղարար ուժերի տեղակայման, փախստականների ու տարածքների վերադարձման հարցերը՝ այդ մասին հայտարարել է Միջազգային ճգնաժամային խմբի եվրոպական ծրագրերի տնօրեն Սաբինա Ֆրեյզերը: «Կողմերին չի հաջողվել համաձայնեցնել մի քանի կարեւոր հայեցակետեր, որոնք վերաբերում են Հայաստանն ու Լեռնային Ղարաբաղը միացնող միջանցքի լայնությանը եւ Ղարաբաղում քվեարկելու մեխանիզմին», - հավելել է Ֆրեյզերը: Ըստ նրա, Ադրբեջանի նախագահական ընտրություններից հետո, որոնք տեղի կունենան հոկտեմբերին, հնարավոր կլինի խոսել Լեռնային Ղարաբաղի հակամարտության կարգավորման մասին: Նրա կարծիքով, Հայաստանն ու Ադրբեջանը պետք է քայլեր ձեռնարկեն բանակցությունների սեղանին դրված սկզբունքների մանրամասնությունները եւ փոխզիջումների անհրաժեշտությունը հասարակությանը բացատրելու ուղղությամբ: «Երկու կողմն էլ պետք է նվազեցնի ռազմական հռետորությունը»,- ասել է Ֆրեյզերը ըստ «Թրենդ» գործակալության:

Կոսովոյի միակողմանի անկախության հռչակումից հետո պաշտոնական Վաշինգթոնը հանդես է եկել Լեռնային Ղարաբաղի կարգավիճակի մասին հայտարարությամբ: «Լեռնային Ղարաբաղի ապագա կարգավիճակը պետք է որոշվի միջազգային բանակցությունների միջոցով»,- նշված է Ադրբեջանում ԱՄՆ դեսպանատան մամուլի հաղորդագրության մեջ: «Հակամարտության կարգավորման ռազմական կամ որեւէ այլ ձեւի կիրառման բոլոր փորձերը, բացի բանակցային փոխզիջումներից, վտանգ են ներկայացնում խաղաղությանն ու կայունությանը Կովկասում», - ասվում է փաստաթղթում, հաղորդում է նույն «Թրենդը»:

1994 թ. զինադադարի մասին համաձայնագիր կնքելուց հետո ղարաբաղյան հակամարտության գոտում ստատուս-քվո է հաստատվել: Հիմա, 14 տարի անց, փորձեր են կատարվում դուրս բերել Ղարաբաղն այդ կարգավիճակից: Եթե սկզբում Հայաստանում, Ադրբեջանում եւ Ղարաբաղում ապրում էին ռազմական գործողությունների վերսկսման կամ արագ կարգավորման սպասողական ռեժիմով, ապա հիմա կարգավորման գործընթացը երկրորդական պլան է մղվել, եւ հասարակ քաղաքացիները տներ են կառուցում, էլեկտրոնային տեխնիկա են գնում, մի խոսքով՝ անխռով ապրում են իրենց առօրյա կյանքով: Օրինակ, եթե 10 տարի առաջ Ղարաբաղում ցանում էին միայն ցորեն, ապա հիմա խաղողի նոր այգիներ են գցում, որոնք բերք են տալիս 5 տարի հետո: Կայունության զգացում կա, թեև փխրուն, բայց, այնուամենայնիվ, կա:

Բոլոր երեք երկրների բնակչության  գործարար խավերին ստատուս-քվոն հնարավորություն է տալիս գումար կուտակել՝ արագ եւ ոչ միշտ օրինական ձեւով, իսկ մնացած մասին ստատուս-քվոն բավարարում է պատերազմը չվերսկսվելու առումով: Բոլոր երեք հասարակություններն էլ, հատկապես՝ Ղարաբաղի, գիտեն, թե ինչ է պատերազմը եւ չեն ցանկանում դրա կրկնությունը:

10 տարի առաջ ստատուս-քվոն ընդամենը պատերազմից, իսկ հիմա՝ անցանկալի կարգավորումից փրկվելու միջոց է (տարածքների, ադրբեջանցի փախստականների վերադարձ, խաղաղարար ուժերի տեղակայում եւ այլն… ): Որպես բացասական կողմեր նշվում են տնտեսական կապերի բացակայությունը, վաղվա օրվա հանդեպ անվստահությունը, բնակչության արտահոսքի աճը: Սակայն այդ բացասականը հանդուրժվում է, քանի որ բոլորը հասկանում են՝ ստատուս-քվոյից դուրս գալը հղի է ավելի վատ հետեւանքներով: 

Կարգավորման փոխընդունելի առաջարկների, խաղաղ համաձայնագրի համար իրավական հիմքերի եւ կամքի բացակայության պայմաններում ստատուս-քվոն զսպող դեր է խաղում: Եւ որքան ամուր է զինադադարը, այնքան դժվար է այն կոտրել «կտրուկ» որոշումներով: Նման պարագայում՝ նկատի ունենալով գերտերությունների շահերի բալանսը եւ սպառազինությունների մրցավազքը տարածաշրջանում, տրամաբանորեն ստատուս-քվոն ոչ թե պետք է խախտել, այն անհրաժեշտ է ամրապնդել: Քանի որ իրավիճակը ոչ թե դեպի խաղաղություն է գնում, այլ պատերազմ: Հետեւաբար, ստատուս-քվոյի պահպանումը շահավետ է նրանց, ով չի ցանկանում պատերազմի վերսկսում, բայց եւ համաձայն չէ «ամեն գնով խաղաղության»: 

Ստատուս-քվոյի պահպանումը ցանկանում են ղարաբաղյան հանրության բոլոր շերտերը: Հայաստանում դրան դեմ են արտահայտվում նրանք, ովքեր հույս ունեն հեշտ ձեւով հարստություն ձեռք բերել նոր պատերազմի ժամանակ, կամ նրանք, ովքեր չեն պատկերացնում քարտեզը եւ համաձայն են «տարածքային զիջումների»: Ադրբեջանում շատերը կխախտեին ստատուս-քվոն, հատկապես՝ ազգայնական, իսլամիստական եւ «ռազմարտադրական» ուժերը:  

 Ստեղծված իրավիճակից դուրս գալու ամենաարդար, միգուցե անիրականալի թվացող ճանապարհը Ադրբեջանի եւ Ղարաբաղի ուղիղ բանակցություններն են՝ ապագա հարեւանության եւ համագործակցության մասին: Ադրբեջանը տարածք կկորցնի քարտեզի վրա, սակայն փոխարենը շատ ավելի մեծ ձեռքբերումներ կունենա: Դրանից կշահի եւ Հայաստանը, եւ հարցը կտեղափոխվի այլ հարթություն՝ հայե՞րը, թե՞ ադրբեջանցիներն ավելի հմուտ կգտնվեն Ղարաբաղի զարգացման գործում:  

Երկու ժողովուրդներն առնվազն երկու ընդհանուր շահ ունեն՝ խաղաղության պահպանում ամբողջ տարածաշրջանում և եվրոպական ինտեգրացիա: Սակայն այդ նպատակներին հասնելու համար երեք երկրների ղեկավարության կամքն է անհրաժեշտ: Ցավոք, բոլոր մեր երկրներում էլ հասարակությունն է կախված «վերեւների» դիրքորոշումից, այլ ոչ թե պետական քաղաքականությունը՝ հանրային կարծիքից:

Դրանից ելնելով՝ կարելի է ենթադրել, որ մոտակա 5-6 տարում ստատուս-քվոն կպահպանվի, սակայն մեզ մոտ կակտիվանան տարածաշրջանային, եվրոպական, միջազգային տնտեսական նախագծերը: Շատ բան կախված կլինի Իրանի հանդեպ ԱՄՆ քաղաքականությունից, ԱՄՆ-ի եւ ՌԴ-ի ապագա նախագահներից: Եւ եթե վստահության «թարմ» քվե ստացած Իլհամ Ալիեւը մոտակա 2 տարում չփորձի «բլից կրիգ» ձեռնարկել Ղարաբաղի դեմ, ապա ստատուս-քվոն, ըստ տրամաբանության, պաշտոնապես կհաստատվի եւս մի 20 տարով՝ մինչեւ տարածաշրջանը «հասնի» Եվրոպա:

 Նաիրա ՀԱՅՐՈՒՄՅԱՆ

ՀՀ ընտրություններ

ՀԱՅ-ՀԱՅԿԱԿԱՆ ԵՐԿԽՈՍՈՒԹՅԱՆ ԱՆՀՐԱԺԵՇՏՈՒԹՅՈՒՆ

Ղարաբաղյան հիմնախնդրի քաղաքական կարգավորման բանակցային գործընթացում արդեն քանի տարի ականատեսն ենք կողմերի մենախոսության, որոնց գումարն ինքնաբերաբար երկխոսության չի վերաճում, և կողմերի միջև իրական երկխոսությունն այդպես էլ չի ստացվում, ինչից էլ ածանցյալ՝ փոխադարձ մեղադրանքները:

Սա, իհարկե, տհաճ երևույթ է, բայց, պարզվում է, դրանից վատն էլ կա: Դա այն է, երբ երկխոսություն չի լինում նաև հանրության ներսում, ցեղակիցների միջև: Սա հետխորհրդային տարածքին բնորոշ երևույթ է և, ցավալի է, շատ ցավալի է, որ այսօր ընդգծված այդպիսին է իրավիճակը մայր Հայաստանում, ուր նորերս ավարտվեցին ՀՀ նախագահի հերթական ընտրությունները:

Ընտրություններին տրված գնահատականները միանշանակ չեն, բայց մի գնահատական չի վիճարկվում ոչ մեկի կողմից. դա այն է, որ ընտրությունները նպաստեցին ոչ թե հասարակության միավորմանը, այլ տարանջատումը խորացնելուն՝ բևեռացման աստիճան: Մեղավորների փնտրտուքն այս պարագայում շնորհակալ գործ չէ, թեև, հանուն արդարության, պիտի ասել, որ ցանկացած իրավիճակի համար առաջին պատասխանատուն գործող իշխանությունն է այն առումով, որ հանրային կյանքում ամենամեծ լծակներն ու մթնոլորտ թելադրելու հնարավորությունները իրենն են: Եւ եթե հանրությանն առաջադրված հիմնական հարցը «Ու՞ր է այն տղամարդը» մարտահրավերն է, ապա կարելի էր ենթադրել, որ վաղ թե ուշ ծնվելու էր պատասխանը՝ «Ես եմ»: Այստեղից էլ՝ քաղաքակիրթ երկխոսության հնարավորության հուղարկավորության փաստը:

Բայց քաղաքակիրթ երկխոսությունն այլընտրանք չունի, քանի որ ոչ ոքի համար գաղտնիք չէ, որ բևեռների ուժերն արդեն համադրելի են դարձել: Ցանկալի կլիներ, որ երկխոսության անհրաժեշտության գիտակցումը չծագեր ուժերի հենց այս համադրելիությունից, այլ բխեր հոգուց և ուղեղից, երկրի ու ժողովրդի ճակատագրի հանդեպ պատասխանատվության զգացումից: Բայց, ինչպես ասում են՝ ունենք այն, ինչ ունենք, և լարվածությունը լիցքաթափելու, իրավիճակից պատվով դուրս գալու շանսեր դեռ կան: Իշխանությունն արդեն խոսում է բանակցությունների ու նույնիսկ կոալիցիոն կառավարության մասին, ընդդիմությունն էլ մտորում է, թե որքանով են այդ խոսքերն անկեղծ ու որքան է խոսքի՝ գործի վերածման հավանականությունը: Այսինքն՝ հավատի մասին է խոսքը, կամ, ինչպես ղարաբաղյան բանակցային գործընթացում է շեշտվում՝ փոխվստահության մթնոլորտի ստեղծման մասին: Այստեղ արդեն պատասխանատվությունը հավասարաչափ է:

Բայց ամենամեծ դասը, որ, ըստ ինձ, պիտի քաղի հայ հանրությունը, դա այն է, որ իրապես արդար ընտրություններն այլընտրանք չունեն, և որ միայն նման ընտրությունները, այլ ոչ թե կարգախոսները կարող են իրապես նպաստել հանրության միավորմանն ու համազգային միասնությանը: Իսկ որ վերջին ընտրությունների իրապես արդար լինելու հարցում լուրջ կասկածներ կան՝ վկայում են գրեթե բոլոր թեկնածուները:

Այստեղ ամենակարևորը սեփական ժողովրդի վստահությունն է: Ինչ խոսք, միջազգային դիտորդների հիմնականում դրական գնահատականները կարևոր են երկրի բարենպաստ իմիջի ապահովման համար, բայց ահա ժողովրդի վստահությունն ու հավատը կարևոր են ոչ միայն իմիջի, այլ էության բարենպաստության համար: Ինչ էլ լինի՝ հանրությունը պիտի հավատա, որ երկրում հնարավոր են իրապես արդար ընտրություններ և իշխանությունն իրապես ընտրությունների միջոցով փոխելու հնարավորություն: Եւ միայն այս պարագայում կարծիքների ներկապնակը հանրագումարում կվերածվի միասնականության:

Դա կլինի վաղը, իսկ այսօր հարկ է իրար օգնել վաղվա այդ հեռանկարը չկործանելու համար: Այս իրավիճակում արցախցիներիս միջամտությունը կարող է և պարտավոր է սահմանափակվել քաղաքակիրթ երկխոսությանն աջակցությամբ:

Գեղամ ԲԱՂԴԱՍԱՐՅԱՆ

ԻՍԿ ՊԵ՞ՏՔ Է, ԱՐԴՅՈՔ, ՈՐ ՋՐԵՐԸ ՊԱՐԶՎԵՆ

Հայաստանի նախագահի ընտրությունները հետաքրքիր ընթացք ունեցան: Նախ՝ ընտրություններն առանձնացան նախընտրական անզիջում պայքարով: Հետո՝ խախտումներով (ինչպես խոստովանել են եւ դիտորդները, եւ նույնիսկ իշխանական կոալիցիայի անդամ դաշնակցականները), «զոռբայությամբ» նախագահ ընտրվեց Հայաստանի վարչապետը, ընդ որում` նրան ձայն է տվել Հայաստանի հասարակության կեսից ոչ ավելին: Մյուս կեսը մինչ օրս Երեւանում շարունակում է բողոքի ցույցեր՝ վիճարկելով ընտրությունների արդյունքները:

Սակայն ամենաբնորոշն այս ընտրություններում, թերեւս, գնահատականների պակասն էր: Կարեւոր իրադարձություններին, դիրքորոշումներին կամ գնահատական չի տրվել, կամ այն թերի էր: Որպես օրինակ դիտարկենք մի քանի հարցեր, որոնք նախընտրական եւ նույնիսկ հետընտրական շրջանում պատասխան այդպես էլ չունեցան:

Նախ՝ ղարաբաղյան հիմնախնդրի մասին: Այս հարցը, թերեւս, ամենաքննարկվողն էր նախընտրական շրջանում, թեև բոլոր թեկնածուներն էլ կոչ էին անում չշահարկել այն: Խնդրո առարկայի առնչությամբ միայն  մի բան է պարզվել՝ Ս. Սարգսյանի եւ Լ. Տեր-Պետրոսյանի դիրքորոշումներն այդ հարցում էականապես չեն տարբերում: Մասնավորապես, առաջին նախագահը հայտարարել է, որ համամիտ է ներկայումս ընթացող բանակցային գործընթացի սկզբունքներին: Այսինքն՝ իշխանության գալու դեպքում նույնպես կհամաձայնվի ազատագրված տարածքները հանձնելուն, փախստականների վերադարձին եւ խաղաղարար ուժերի տեղաբաշխմանը: Նույն բանն էր ասում Ս. Սարգսյանը, որը ժամանակին նույնիսկ հայտարարել է, որ Աղդամն երբեք հայկական հող չի եղել:

 Այդ ամենի վերաբերյալ Ղարաբաղից ոչ մի գնահատական չհնչեց: Միայն օրերս Երեւանում կայացած ասուլիսի ժամանակ ԼՂՀ նախագահ Բակո Սահակյանը ասել է, որ «Լ. Տեր-Պետրոսյանի ծրագրի հանդեպ իր վերաբերմունքը բացասական է»: Նա չի մանրամասնել, թե ինչու: Եւ այդ գնահատականը Ղարաբաղի բնակչության համար անհասկանալի է մնացել ու հաստատ նոր խմորումների տեղիք կտա: Չէ՞ որ անհասկանալի է՝ կոնկրետ ինչո՞վ են վտանգավոր Լ. Տեր-Պետրոսյանը եւ, հետեւաբար, Ս. Սարգսյանը, որի հետ նա համամիտ է Ղարաբաղի հարցում:

Երկրորդ անհասկանալի հարցը Մեղրին է: Արդյո՞ք եղել է Մեղրիի հանձնման ծրագիր, քննարկվե՞լ է ամենայն լրջությամբ: Հայաստանի ներկայիս իշխանությունները պնդում են, որ դա ընդամենը Պոլ Գոբլի ծրագիրն էր: Լ. Տեր-Պետրոսյանի թիմակիցները ասում են, որ ծրագիրը չի ստորագրվել միայն Հ. Ալիեւի հիվանդության պատճառով: Որ հարցը շատ լուրջ է, վկայում է Արամ Կարապետյանի ձերբակալությունը՝ հենց այդ տեղեկությունները «բացահայտելու» պատճառով: Ու այս հարցում եւս Ղարաբաղից գնահատական չհնչեց:

Նույն պատմությունը կրկնվեց, երբ գործող նախագահ Ռոբերտ Քոչարյանը բացահայտեց, թե ինչպես էր Լ. Տեր-Պետրոսյանն իրեն եւ Ղարաբաղի այն ժամանակվա ղեկավարներին «հորդորում» հանձնել Քարվաճառը: Այդ «հորդորման» այլ մասնակիցներ բացահայտումներով հանդես չեկան եւ ճշմարտությունը չփորձեցին պարզել:

Տպավորությունն այնպիսին է, որ ոչ ոքի ձեռնտու չէ ճշմարտության բացահայտումը՝ ոչ իշխանություններին, ոչ ընդդիմությանը: Հակառակ պարագայում անցած մի քանի ամսվա ընթացքում հիմնական թեկնածուները գոնե մեկ անգամ բանավեճի կհրավիրեին իրար: Գաղտնիք չէ, որ բազմաթիվ հարցերի գնահատականներն ու պատասխանները հենց դեմ առ դեմ զրուցի ժամանակ կարող են պարզվել: Բայց, արդյո՞ք, պետք է ջրերը պարզվեն:

Նաիրա ՀԱՅՐՈՒՄՅԱՆ

Կոսովո

ՍՏԵՓԱՆԱԿԵՐՏ-ՊՐԻՇՏԻՆԱ` ՏՐԱՆԶԻՏ

Կոսովոն հայտարարեց իր անկախության մասին, եւ այդ հայտարարումը ցուցադրվեց աշխարհի հեղինակավոր հեռուստաալիքների ուղիղ եթերում: Իհարկե, պետք է ուրախ լինել ինքնորոշման ցանկացած փաստի համար, բայց այդ հանգամանքը ինչ որ տեղ նաեւ վիրավորական է, որ, օրինակ, Ղարաբաղի ժողովրդի անկախության հռչակումը որեւէ հեղինակավոր հեռուստաալիք այդպես էլ չցուցադրեց ոչ ուղիղ եթերում, ու ոչ էլ՝ նկարահանած: Ավելին, Կոսովոյի անկախությունը շուտով կսկսեն ճանաչել աշխարհի շատ երկրներ, մինչդեռ Ղարաբաղի անկախությունը պաշտոնապես դեռ ճանաչված չէ որեւէ երկրում: Մյուս կողմից, սակայն, այդ ամենը միայն առաջին հայացքից է թվում անարդարացի, մինչդեռ փոքր ինչ խորը դիտարկման դեպքում ամեն ինչ երեւում է միանգամայն տրամաբանական զարգացման լույսի ներքո: Դրա համար արժե ուշադրություն դարձնել, թե ինչ է արել Ղարաբաղն իր անկախության միջազգային ճանաչման համար, եւ ինչ է արել Կոսովոն:

Կոսովոն, օրինակ, երբեք իր անելիքը չի կապել Ալբանիայի հետ: Կոսովոյի իշխանությունը երբեք չի զիջել իր դիրքը հակամարտության միջազգային գործընթացում եւ չի համաձայնել, որ իրեն ներկայացնի Ալբանիան: Այսինքն՝ արվել է հնարավորը, որպեսզի Կոսովոն մնա հակամարտության ուղղակի կողմ: Նույնը չի կարելի ասել Լեռնային Ղարաբաղի համար, որի իշխանությունը աստիճանական ու հետեւողական ջանքով վերածվեց ընդամենը մի մարմնի, որի արտաքին քաղաքական գործառույթը սահմանափակվում էր համահայկական դրամահավաքներով: Այսինքն, Ղարաբաղի ամբողջ իշխանությունը փաստացի սկսեց կատարել ընդամենը Սփյուռքի հետ կապի նախարարության ֆունկցիա: Ու, թերեւս, պատահական չէ, որ Ղարաբաղի նախկին նախագահ Արկադի Ղուկասյանին այսօր համարում են Հայաստանում նոր ստեղծվելիք Սփյուռքի նախարարության ղեկավարի հիմնական հավակնորդը:

Արկադի Ղուկասյանի այդ քաղաքականությունը կարծես թե շարունակում է ներկայիս նախագահ Բակո Սահակյանը, որի ընտրությունից անցել է արդեն ավելի քան կես տարի, բայց որը թերեւս տեսանելի կես քայլ անգամ չի արել Լեռնային Ղարաբաղի սուբյեկտությունը վերականգնելու համար: Այդ համատեքստում, իհարկե, անիմաստ է խոսել Կոսովոյի նախադեպ լինելու մասին: Թեկուզ միայն այն պարզ պատճառով, որ եթե խնդիրը նախադեպն է, ապա այդպիսին կարող էր լինել նաեւ Արեւելյան Թիմորը: Մինչդեռ իրական քաղաքականության մեջ առաջնորդվում են ոչ թե նախադեպերով, այլ շահով: Սա պարզ ճշմարտություն է, որը թերեւս գաղտնիք չպետք է լինի որեւէ մեկի համար: Հետեւաբար, եթե միջազգային քաղաքական կենտրոնների շահը պահանջում է, ապա Ղարաբաղի անկախությունը ճանաչելու համար նրանք չեն ընկնի որեւէ նախադեպի հետեւից:

Ամբողջ խնդիրն այն է, թե արդյոք ում շահից է բխում Ղարաբաղի անկախության ճանաչումը: Դատելով ներկայիս գործընթացից, եթե Ղարաբաղի անկախությունը բխում է որեւէ մեկի շահից, ապա դա ընդամենը երկարաժամկետ հեռանկարում: Այսինքն, ոչ կարճաժամկետ, ու ոչ էլ միջնաժամկետ կտրվածքով նկատելի չէ, որ միջազգային քաղաքականության որեւէ կենտրոն շահագրգռված լինի Ղարաբաղի անկախության ճանաչմամբ: Ավելին, մեծ է վտանգը, որ տարածաշրջանային դինամիկ պրոցեսները ոչ միայն կմեծացնեն աշխարհի համար ճանաչման նպատակահարմարությունը, այլ ավելի կհեռացնեն այն: Այդ համատեքստում է, որ բավական վտանգավոր է դառնում Լեռնային Ղարաբաղի իշխանության իներտ կեցվածքը տարածաշրջանային պրոցեսներում, եւ ընդհանրապես աշխարհի հետ հարաբերություններում: Իսկ աշխարհի հետ հարաբերությունը Ղարաբաղի իշխանությունը պետք է սկսի Հայաստանից: Ժամանակն է, որ Ղարաբաղը փորձի Հայաստանից “վերանվաճել” իր սուբյեկտությունը: Վերանվաճել բառն առայժմ չակերտների մեջ է, քանի որ ցանկալի չէ պատկերացնել, որ Հայաստանը կարող է լինել այդ սուբյեկտության հակառակորդ, այսինքն՝ ընդդիմանալ Ղարաբաղի այդ կարգավիճակի վերականգնմանը: Ցավալի է, բայց Ղարաբաղի նոր իշխանությունը դեռեւս այդ ուղղությամբ չի գործադրում անհրաժեշտ ջանք: Սակայն այդ բացը կարող է լրացնել Հայաստանի ղեկավարությունը, իր կողմից խթանելով այդ գործընթացը:

Հնարավոր է նաեւ, որ Ղարաբաղի նոր իշխանությունը պարզապես սպասողական կեցվածք էր ընդունել, որպեսզի Հայաստանում ավարտվի նախագահի ընտրության գործընթացը եւ փակվի իշխանության ձեւավորման ցիկլը: Դա ինչ որ առումով կարող է լինել տրամաբանական: Սակայն եթե այդ ցիկլից հետո չսկսվեց Ղարաբաղի միջազգային սուբյեկտության վերականգնման գործընթաց, ապա դրա համար Հայաստանի ու Ղարաբաղի նոր իշխանությունները թերեւս չեն ունենալու արդեն որեւէ տրամաբանական բացատրություն:

Հակոբ ԲԱԴԱԼՅԱՆ

«Լրագիր»

Բոսնիայի Սերբական Հանրապետությունը կարող է անկախություն հռչակել

Բոսնիայից եւ Հերցեգովինայից

 Բոսնիայի Սերբական Հանրապետության (ՍՀ) վարչապետ Միլորադ Դոդիկը թույլ է տվել անկախության հռչակումը, եթե Սարաեւով առաջվա պես իր քաղաքականությամբ հարցականի տակ է դնելու Բոսնիայի եւ Հերցեգովինայի (ԲեւՀ) կազմում այդ ազգային-տարածքային կազմավորման կարգավիճակը:

ՍՀ-ն ապագայում կարող է օգտվել ինքնորոշման իրավունքից, այն առանց վարանելու կստուգի իր քաղաքացիների կարծիքը հանրաքվեի միջոցով, ասել է Դոդիկը: Հանրաքվեն կկայանա, եթե ՍՀ-ի դիրքերը ԲեւՀ-ի կազմում ամրապնդելու փորձերը արդյունքներ չտան:

«ՍՀ-ի գոյությունը չի կարող եւ չի դրվի երբեք կասկածի տակ»,- ընդգծել է վարչապետը: Նրա խոսքերով, Կոսովոյի անկախության հռչակումը ոչ միայն վտանգավոր նախադեպ է ստեղծել, այլեւ «նոր իրավունք, պրակտիկա եւ սկզբունքներ»: Արեւմուտքի կողմից այդ քայլի ճանաչումը «ոչնչացրեց հավատը եվրոպական արժեքների նկատմամբ»: Եվրոպան «Կոսովոյի եւ ԲեւՀ-ի նկատմամբ երկակի չափանիշների քաղաքականություն է վարում»:

ՍՀ կառավարության ղեկավարը նաեւ կողմ է ԲեւՀ-ում միջազգային վարչակարգի լիազորությունների դադարեցմանը: «Բոլոր բարեփոխումները միջազգային հանրության ղեկավարությամբ պետք է դադարեն եւ դառնան ԲեւՀ-ի քաղաքացիների գործը: Հակառակ դեպքում որեւէ բարեփոխումներ ընդհանրապես չեն լինի»,- ընդգծել է վարչապետը, հաղորդում է NEWSRU.com-ը:

Հայաստանը դեռեւս չի պատրաստվում

ճանաչել Կոսովոյի անկախությունը

 Հայաստանը դեռեւս չի պատրաստվում ճանաչել Կոսովոյի անկախությունը: Այդ մասին Երեւանում հայտարարել է ՀՀ արտգործնախարար Վարդան Օսկանյանը: Նրա խոսքերով, տվյալ հարցը քննարկվում եւ որոշումը կհրապարակվի երկրի համար հարկ եղած ժամանակ:

Միեւնույն ժամանակ, ԱԳՆ ղեկավարն ընդգծել է, որ անկախություն տրամադրելով Կոսովոյին, միջազգային հանրությունը խախտել է իրավական նորմերը, միեւնույն ժամանակ, մոռանալով Լեռնային Ղարաբաղի մասին: «Լեռնային Ղարաբաղին, ի տարբերություն Կոսովոյի, ոչ ոք անկախություն չի տրամադրել, Ղարաբաղն ինքն է նվաճել այն: Դրանում է երկու հակամարտությունների գլխավոր տարբերությունը»,-ասել է Օսկանյանը:

Հիշեցնենք, որ Կոսովոյի խորհրդարանը 2008 թվականի փետրվարի 17-ին քվեարկել է երկրամասի անկախությունը ճանաչող հռչակագրի օգտին: Հռչակագրի ընդունման օգտին են քվեարկել խորհրդարանի 109 պատգամավորներ: Սերբերի ներկայացուցիչները, որոնք 10 տեղ ունեն խորհրդարանում, այդ արարողությանը ներկա չեն եղել: Կոսովոյի անկախությունն արդեն իսկ ճանաչել են ԱՄՆ-ն եւ մի շարք եվրոպական պետություններ, որոնց հետ Սերբիան խզել է դիվանագիտական հարաբերությունները:

ՆԱՏՕ-ի զորքերը

կենտրոնանում են

Կոսովոյի եւ Սերբիայի սահմանին

Կոսովոյի տարածքում տեղակայված ՆԱՏՕ-ի զորքերը կենտրոնացվում են Սերբիայի հետ սահմանին՝ տարածաշրջանի հյուսիսում: Ըստ Կոսովոյում Հյուսիսատլանտյան առաքելության (KFOR) ներկայացուցիչ գնդապետ Բերտրան Բոննոյի, խոսքը գնում է սերբական շրջաններում իրադրությունը կարգավորելու մասին, որտեղ տեղական ազգայնականները հարձակում էին կատարել ՄԱԿ-ի եւ ԵԱՀԿ-ի ներկայացուցչությունների վրա, ինչպես նաեւ անցագրային կետերի վրա՝ սերբ-կոսովյան վարչական սահմանին:

ՆԱՏՕ-ի հրամանատարությունը հայտարարում է, որ զինվորականները արդեն այս պահին պատրաստ են խառնվել իրադրությանը: Այլ տվյալներով, խաղաղապահներն արդեն ժամանալ են այն կայաններից մեկի մոտ, որը հրդեհվել էր: Չճշտված տվյալներով, Կոսովոյի հյուսիսում աճում է լարվածությունը եւ անկարգություններ են կատարվում: Ինչպես հայտնել են երեքշաբթի Պրիշտինայում, մասնավորապես, տարածաշրջանի սերբական փոքրամասնությունները անկարգություններ են կազմակերպում եւ հրդեհում են վարչական շենքերը Կոսովոյի հյուսիսում՝ Զուբեն Պոտոկ բնակավայրի շրջանում: Որոշ տվյալներով, այդ վարչական շենքերը հանդիսանում են Սերբիայից Կոսովո բեռների փոխադրման մաքսային կետերը,- հաղորդում է Reuters-ը:

Վերջին օրերին հաղորդագրություններ էին ստացվում այն մասին, որ տասնյակ սերբ ազգայնականներ փորձում են ներխուժել Միտրովիցա քաղաքի շրջան, որպեսզի խոչընդոտեն Կոսովոյի եւ սերբերով բնակեցված տարածաշրջանի բաժանմանը: Սերբիայի ոստիկանությունը փորձում էր թույլ չտալ դա, սակայն ակնհայտ է, որ իրադրությունը դուրս է գալիս վերահսկողությունից:

Կոսովոն անկախություն է հռչակել փետրվարի 17-ին: Ներկա դրությամբ Կոսովոյի անկախությունը ճանաչել են Ավղանստանը, ԱՄՆ-ն, Մեծ Բրիտանիան, Թուրքիան, Ֆրանսիան եւ Ավստրալիան: Եւս մի քանի երկիր հայտարարել են, որ կանեն դա առաջիկա օրերին:

 www.PanARMENIAN.Net
 

ԵՐԿԱՐ ՍՊԱՍՎԱԾ ՀԻՊՈԹԵՔԱՅԻՆ ՎԱՐԿԱՎՈՐՈՒՄԸ ՇՈՒՏՈՎ ԿՄԵԿՆԱՐԿԻ 

Հիպոթեքային վարկավորման մեկնարկի մասին արդեն երրորդ տարին է, ինչ խոսվում է: Այդ նպատակով առաջին տարում պետբյուջեով 200 մլն դրամ է հատկացվել, երկրորդ տարում՝ 500 մլն դրամ, սակայն ծրագիրն այդպես էլ մնաց օդում կախված: Հիմա կարծես թե որոշվել է ծրագրի մեկնարկը տալ: Մեր տեղեկություններով՝ անցած տարիներին հատկացված այդ 700 մլն դրամը նույնպես ուղղվելու է այս նոր ծրագրի իրականացմանը: ԼՂՀ կառավարությունն օրերս հաստատել է բանկերի կողմից հիպոթեքային վարկավորմամբ բնակարաններ եւ բնակելի տներ ձեռք բերելու պետական աջակցության ապահովման կարգը: Կարգի մանրամասները օրերս ներկայացրել են ԼՂՀ վարչապետ Արա Հարությունյանը եւ Արցախի ներդրումային հիմնադրամի ղեկավար Կարեն Եսայանը:

 Որոշման համաձայն, հիպոթեքային ծրագիրն առայժմ կիրագործվի Ստեփանակերտում եւ հանրապետության շրջկենտրոններում: Բնակարաններ ձեռք բերելու համար տրամադրվող վարկի առավելագույն չափը 25 մլն դրամ է, մարման ժամկետը՝  20 տարի: Հանրապետությունում գործող մի շարք բանկերի կողմից տրամադրվող հիպոթեքային վարկի առավելագույն տարեկան տոկոսադրույքը 12 տոկոս է, որի կեսը կմարի Արցախի ներդրումային հիմնադրամը, իսկ մյուս կեսը՝ քաղաքացին: Ի դեպ, հիմնադրամի գլխավոր տնօրեն Կարեն Եսայանի խոսքերով, պետության կողմից մարվող 6 տոկոսի գումարը վերադարձման ենթակա չէ: Վերադարձման ենթակա է միայն բանկի կողմից պահանջվող երաշխիքային կանխավճարի որոշակի մասի փոխհատուցման գումարը:            Հանրապետության առաջին գոտում /Ստեփանակերտում/ բնակարան ձեռք բերելու համար բանկերը պահանջում են 20 տոկոս կանխավճար, երկրորդ գոտում /շրջկենտրոններում/` 30 տոկոս: Ի տարբերություն պետության կողմից 6 տոկոս տոկոսադրույքի սուբսիդավորմանը, որից կարող են օգտվել բոլոր ցանկացողները, կանխավճարի մասնակի մարումից բոլորը կարող են օգտվել, եթե բնակարան են ձեռք բերում առաջնային շուկայից /նոր կառուցվող շենքերից/: Իսկ երկրորդային շուկայից բնակարան ձեռք բերելու համար կանխավճարի մասնակի մարման աջակցությունից կարող են օգտվել միայն զոհված ազատամարտիկների ժառանգները եւ արցախյան պատերազմի հաշմանդամները: Հաշվի առնելով քաղաքացիների հնարավորությունները, կառավարությունը որոշել է փոխհատուցել առաջին գոտում պահանջվող 20 տոկոսի չափով կանխավճարի 10 տոկոսը, իսկ երկրորդ գոտում՝ 30 տոկոսի 20 տոկոսը: Առանձնատների կառուցման դեպքում, վարչապետի խոսքերով, երեւի կանխավճար մուծելու կարիք չի լինի: Իսկ լրագրողի այն հարցին, թե առանձնատների կառուցման համար հատուկ գոտիներ հատկացվելո՞ւ են, վարչապետը պատասխանեց, որ Ստեփանակերտում դժվար է այդ գոտու ապահովումը, քանի որ քաղաքը առանձնատների մասով զարգանալու այդքան էլ մեծ հնարավորություններ չունի, բայց շրջկենտրոններում այդ հարցն ավելի հեշտ կարելի է լուծել:

Հիպոթեքային վարկավորման նման մեխանիզմներն աշխատելու են նաեւ բնակարանների նորոգման համար: Սակայն այստեղ առավելագույն գումարը կազմում է 3 մլն դրամ, մարման ժամկետը՝ 5 տարի եւ տարեկան մինչեւ 15 տոկոս տոկոսադրույքով: Նույն սուբսիդավորումը իրականացվելու է նաեւ այս մասով:

Որքանո՞վ է երաշխավորված, որ բանկերը տարիներ հետո փոփոխության չեն ենթարկի սահմանված տոկոսադրույքը: Վարչապետը հավաստիացրեց, որ նույնիսկ այդ դեպքում քաղաքացին մինչեւ վարկի մարման ժամկետը կվճարի առաջին իսկ օրից սահմանված 6 տոկոսը: Վարչապետը միաժամանակ շեշտեց, որ վարկավորմանը աջակցելու համար անհրաժեշտ ֆինանսական միջոցները կան, այս առումով ոչ մի խնդիր չունեն: Դրանք, ըստ նրա, եւ պետբյուջեի գումարներն են, եւ դրանցից ստացված լրացուցիչ եկամուտները, իսկ անհրաժեշտության դեպքում լրացուցիչ ռեսուրսներ եւս կընդգրկեն:

Իսկ թե ընտանիքը ամսական որքա՞ն եկամուտ պետք է ունենա բնակարան ձեռք բերելու կամ առանձնատուն կառուցելու համար՝ կախված է նրանից, թե ինչ տեսակի բնակարան է գնում, քանի քառ. մետրով, որքան ժամկետով եւ այլն: ԼՂՀ վարչապետի եւ Արցախի ներդրումային հիմնադրամի գլխավոր տնօրենի խոսքերով, կարգի հիմնական շեշտը դրվում է հանրապետության առաջնային շուկայի ձեւավորմանն ու զարգացմանը, հետեւապես՝ բնակարանաշինությանը: Նրանք խորհուրդ են տալիս չշտապել եւ ձգտել տուն գնել առաջնային շուկայից, որի բնակարանների քառ. մետրի գինը շատ քիչ է տարբերվելու երկրորդային շուկայի բնակարանի քառ. մետրի գնից: Բացի այդ, երկրորդային շուկայից բնակարան ձեռք բերելու համար սահմանված մարման ժամկետը մինչեւ 15 տարի է, ուստի ամսական անհրաժեշտ գումարն էլ է ավելի մեծ լինելու:

Իսկ ովքե՞ր կարող են օգտվել այդ կարգի շրջանակներում իրականացվող վարկավորումից, ի՞նչ ընդհանուր պայմաններով: Պարզվում է, որ առաջին գոտում պահանջվում է, որ քաղաքացին 10 եւ ավելի տարիների գրանցում ունենա եւ այդքան ժամանակ բնակված լինի, երկրորդ գոտում՝ 5 տարի, իսկ վերանորոգման համար տվյալ բնակավայրում ընդամենը 3 տարվա հաշվառում է պետք: Կան նաեւ տարիքային սահմանափակումներ. անհրաժեշտ է, որ վարկից օգտվողի 18 տարին լրացած լինի: Ամեն դեպքում քաղաքացին պետք է վարկը մարի մինչեւ կենսաթոշակային տարիքը լրանալը:

Առաջնային շուկայի զարգացման համար կառավարությունն արդեն պայմանավորվել է շինարարական որոշ կազմակերպությունների հետ, որոնք պատրաստ են իրենց հաշվին սկսել բազմաբնակարան շենքերի կառուցման աշխատանքները: Նրանց համար եւս արտոնյալ պայմաններ են ստեղծված, արտոնյալ վարկային ռեսուրսներ են հատկացվելու: Շենքերի կառուցումն ավարտելուց հետո այդ բնակարանները հնարավոր կլինի հիպոթեքային վարկավորման մեխանիզմով հատկացնել ԼՂՀ քաղաքացիներին: Այս մասին ասաց Ա.Հարությունյանը, նաեւ տեղեկացնելով, որ մայրաքաղաքում արդեն կառուցվում են երկու բազմաբնակարան շենքեր, ծրագրվում է նաեւ 4 շենքի կառուցում, ինչպես նաեւ՝ կահույքի ֆաբրիկայի տեղամասում բնակթաղամասի ստեղծում:

Ներդրումային հիմնադրամի ղեկավարը խոսեց նաեւ իրենց կողմից նախատեսվող մեկ այլ ծրագրի մասին, ըստ որի հիմնադրամը իր միջոցների հաշվին շենքեր է կառուցելու շրջկենտրոններում: Արդյունքում բնակարանների վաճառքից ստացված գումարները եւս ուղղվելու են նոր շենքերի կառուցմանը: «Հաջորդ տարվա առաջին ամիսներին կկարողանաք մեր կողմից կառուցվող բնակարանները ներկայացնել գնման, չնայած դրա հնարավորությունը քաղաքացիները կարող են ունենալ նաեւ շինարարության ընթացքում»,- հայտարարել է Կարեն Եսայանը:

Հիպոթեքային վարկավորմամբ բնակարաններ եւ բնակելի տներ ձեռք բերելու պետական աջակցության ապահովման կարգը կհրապարակվի մոտ ժամանակներս, որից հետո էլ կհայտարարվի, թե երբվանից կարող են քաղաքացիները ներկայացնել իրենց հայտերը:

Անահիտ ԴԱՆԻԵԼՅԱՆ

բարքեր

 ԵԿԵՂԵՑՈՒ ԾԽՈՂ «ՍՈՒՐԲԸ» 

Հուլիսի սկիզբն էր, գյուղացու համար աշխատանքի ամենաեռուն շրջանը, երբ, ժողովրդի ասած, քիթ սրբելու ժամանակ էլ չկա: Ես շտապում էի ավարտել տանտիրուհու առօրյա գործերս, որպեսզի այգի գնամ (ահավոր բան է մենատնտես լինելը, երբ տարբեր վայրերում փոքրիկ հողակտորներ ունես, իսկ ինքդ էլ ոչ օգնական ունես, ոչ էլ ավտոմեքենա):

Մեկ էլ հանկարծ դարպասը բացեցին, գնացի տեսնելու, թե ով է եկել: Ամուսինս էր՝ երեք անծանոթների հետ: Եկան, բարեւեցին ռուսերեն:

-Մեզ հրավիրել են թեյ խմելու, կարելի՞ է:
-Իհարկե, կարելի է, ուրախ եմ օտարերկրյա հյուրեր ընդունելու:

Ծանոթացանք՝ նրանք զբոսաշրջիկներ էին, աղջիկ ու տղա, իսկ երրորդը նրանց վարորդն էր Երեւանից: Երկուսն էլ տնտեսագետ են, աղջիկը ուկրաինուհի  էր, տղան՝ լեհ, երկուսն էլ աշխատում են Չեխիայում: Հայաստանում շրջելուց հետո ցանկացան նաեւ Ղարաբաղը տեսնել: Արդեն այցելել էին մի շարք տեղեր, հիմա էլ եկել էին մեր շրջանը եւ ճանապարհը շփոթել էին: Ճանապարհին հանդիպեցին հարեւան գյուղից ոտքով տուն եկող ամուսնուս, հարցրին եկեղեցու ճանապարհը, դե, ամուսինս էլ տուն հրավիրեց: Նրանք սիրով ընդունեցին հրավերը:

Ես մինչ թեյի, սուրճի պատրաստություն էի տեսնում, Տանյան եւ Կշիշտոֆը խնդրեցին բնակարանը նայել: Նրանց հետաքրքրում էր ամեն ինչ՝ ինչպե՞ս ենք ապրում, ի՞նչ մրգեր են այստեղ աճում, ի՞նչ ազգային ուտելիքներ ունենք: Նույնիսկ լուսանկարներ խնդրեցին, որպեսզի նաեւ երեխաներիս հետ ծանոթանան: Նկարներից իմացան, որ երկու որդի ունեմ, ավագը նոր է վերադարձել բանակից, իսկ կրտսերը գնացել է եղբորը փոխարինելու:

Տանյան երկար զննեց մի լուսանկար, որտեղ ես մուրաբա էի եփում: Հարցրեց, թե ինչի մուրաբա եմ եփում, պատասխանեցի հայերեն.

- Մոշի:
- Իսկ դա ի՞նչ է:
- Հիմա ցույց կտամ, թե դա ինչ է:

Քանի որ մոշը դեռ չէր հասել, ես անցյալ տարվանից մնացած մի բանկա մոշի մուրաբա բացեցի: Բացեցի նաեւ ընկույզի թարմ մուրաբա, հյուրասիրեցի նրանց: Խմեցին մեծ հաճույքով, գովեցին մուրաբաները, որոնք առաջին անգամ էին համտեսում: Իսկ հետո Տանյան ինձ խնդրեց միասին գնալ եկեղեցի: Ես թողեցի բոլոր գործերս եւ գնացի նրանց հետ, չէ՞ որ նրանցից ոչ մեկը ծանոթ չէր տեղանքին: Փաստորեն ես Տանյայի եւ Կշիշտոֆի գիդն էի: Նրանք ուշադիր զննեցին վանքը, հարակից բոլոր կառույցները, հետաքրքրվեցին վանքի պատմությամբ: Պատմեցի՝ ինչ գիտեի:

Հետո նրանք ցանկացան զրուցել Տեր Հոր հետ: Ես նրանց ուղեկցեցի Տեր Հոր կացարանը: Տեր Հայրը սենյակում քայլում էր ոտաբոբիկ, առանց գուլպաների, ծխախոտը բերանում: Ինձ թվաց, թե հնամյա վանքը մի վայրկյանում կորցրեց իր խորհուրդը, երբ հանդիպեցինք վանքի ծխող «սրբին»:

Տեր Հոր հետ երկար զրուցեցին, խոսեցին նաեւ մեղքերի մասին՝ ներելի եւ աններելի: Ես չդիմացա եւ հայերեն, որպեսզի հյուրերը չհասկանան, հարցրի Տեր Հորը.

- Ծխելը մե՞ղք է:
Նա պատասխանեց ռուսերեն.
- Այո, մեղք է:
- Ստացվում է, որ Դուք Աստծո ամեն օր մե՞ղք եք գործում,- այս անգամ հարցրեց Տանյան:
- Ստացվում է, որ այո, սակայն եթե մարդ պիտի մեղք գործի, ապա թող գործի այս չափով:
Ես համաձայն չեմ Տեր Հոր հետ, չի կարելի մեղք գործել թեկուզ փոքր չափով, մանավանդ՝ հոգեւորականը, այն էլ՝ վանքի պարիսպներից ներս:
Մենք վերադարձանք տուն, հրաժեշտից առաջ լուսանկարվեցինք միասին, ասացին, որ իրենց դուր եկավ Ղարաբաղը, որ կվերադառնան նորից: Շնորհակալություն հայտնեցին հյուրասիրության համար: Ես էլ շնորհակալություն հայտնեցի, որ նրանք հետաքրքրվեցին մեզանով, ծախսեցին իրենց գումարն ու ժամանակը եւ զբոսնելու համար վայր ընտրեցին Հայաստանն ու Ղարաբաղը:
- Իսկ Ադրբեջանում չե՞ք եղել,- հարցրի հրաժեշտից առաջ:
- Ոչ:
- Իսկ չէի՞ք ցանկանա:
- Ոչ:
Համոզված եմ, որ Տանյան եւ Կշիշտոֆը բարի եւ ջերմ հիշողություններ տարան իրենց հետ Ղարաբաղից:
Միակ տխուր ու անսովոր բանը, որ նրանք տեսան Ղարաբաղում, դա, թերեւս, ծխող քահանան էր:

 Սուսաննա ՀԱՐՈՒԹՅՈՒՆՅԱՆ

ԴՐԱՄ ՈՒՆԵՍ՝ ՁԵՌՔԴ ԿՀԱՄԲՈՒՐԵՆ

Սենյակի բազկաթոռին մեկնվել է ինչպես մի աժդահա, ծխախոտ է ծխում եւ մտածում իր անելիքների մասին: Երբեմն նրան դժվար են թվում իրականացվելիք ծրագրերը, բայց նա հիշում է իր դոլարակույտի մասին, և դեմքից իսկույն չքանում է դժգոհությունն ու մի քմահաճ ծիծաղ է հայտնվում: Նա ձեռք կբերի այն ամենը, ինչ կցանկանա. չէ՞ որ բոլորը գլուխ են խոնարհում նրա կապիտալի առաջ: Ո՞վ կհամարձակվի հակառակվել նրան, ո՞վ կհամարձակվի նրան ծուռ նայել, կամ ծուռ խոսք ասել: Ոչ ոք, ոչ ոք նրան չի հակառակվի. նա մեծահարուստ է, նրա փողը նույնիսկ կացինը չի կտրի, նա իր փողով ամեն ինչ կարող է անել, կարող է յուրաքանչյուրին իրեն ենթարկեցնել, բամբասողներին կարող  է լռեցնել, փողի համար ամեն քայլի պատրաստ ընկերներ գտնել: Նա «ամենակարող» է:

Նրան սիրում են ու հարգում, իսկ ավելի ճիշտ՝ սիրում ու հարգում են նրա փողերը եւ փորձում են այդ փողի դեզից մի քանի «կանաչ» հաջողացնել ու դրա համար նրա կողքինները պատրաստ են ամեն ինչի: Երբ նա մտնում է իր «օբյեկտներից» որեւէ մեկը՝ քծնողների բանակը ընդառաջ է վազում նրան եւ մինչեւ գետին խոնարհվելով՝ քծնանքի «բառարանից» հանած հաճոյախոսություններով փորձում գրավել նրա սիրտը եւ դրանով իսկ նրա կարողությանը մոտ լինել եւ որեւէ կերպ օգտվել:

Սակայն նա այս ամենը շատ լավ է հասկանում, գիտի, որ գլուխ են խոնարհում ոչ թե իր, այլ իր ունեցվածքի առաջ: Բայց, այնուամենայնիվ, նա ձեւացնում է, թե ոչինչ չի հասկանում, մարդկանց քծնանքները ժպիտով է ընդունում եւ մի քանի «գրոշ» նետում նրանց: Վերջիններս էլ ուրախությամբ են ընդունում եւ կրկին որեւէ բան կորզելու նպատակով գլուխները նորից խոթում «բառարանի» մեջ եւ նախորդներից ավելի պատկերավոր ու ազդու հաճոյախոսություններ փնտրում:

Երբ նա քայլում է փողոցով, աղջիկները մեկը մյուսին հրելով՝ փորձում են իրենց սեթեւեթանքներով գրավել նրան, իսկ իրենց աղջիկների բարեկեցիկ ապագայով մտահոգված մայրիկներն էլ «պատվիրակներ» են ուղարկում նրա մոտ՝ իրենց դստրերի «գովազդային հոլովակով» հանդերձ: Ոմանք էլ պատրաստ են փողի համար նրա սիրուհին դառնալ: Բայց ամենաահավորն այն է, որ նրանց ամուսիններն էլ են պատրաստ իրենց կանանց նրա սիրուհին դարձնել հանուն «փող» կոչեցյալի:

Եւ նույնիսկ քահանան, որ, թվում է, չպիտի գայթակղվի փողով, պատրաստ է օրերով աղոթել այդ մարդու համար, Աստծուց խնդրել, որ նրա հոգին դրախտ ընկնի, միայն թե միլիոնատերը գոհացնի նրան փողով: Բոլորը, բոլորը պատրաստ են գոհացնել հարուստին հանուն փողի:

Նա նստած բազկաթոռին շարունակում է ծխել, ծխել ու ծիծաղել մարդկանց վրա: «Դրամ ունես՝ աշխարհը ձեռքդ կհամբուրի»՝  մտածում է նա: Նա նմանեցնում է իրեն մի հսկա ծառի, որի փարթամ ճյուղերի տակ մարդիկ պաշտպանվում են անձրեւից ու արեւից:

Բայց նա նաև լավ է հիշում, որ տարիներ առաջ, երբ ինքն ընդամենը թուփ էր՝ նույնիսկ մրջյունը չէր թաքնվում նրա փոքրիկ ճյուղերի տակ: Նա լավ է հիշում այդ տարիները, երբ մարդիկ պարսավանքով էին իրեն նայում, արհամարհում էին եւ մարդու տեղ չէին դնում: Բայց հենց նա հաղթահարեց աղքատությունը եւ հայտնվեց փողի օվկիանոսում՝ բոլորը միանգամից դեն շպրտեցին հին դիմակները, աննկատ նորերը հագան եւ իրենց նոր դերի մեջ մտան: Սակայն ոչ ոք չհասկացավ, կամ չուզեց հասկանալ, որ ռեժիսորը ամեն ինչ տեսավ: Բոլորը մոռացել էին, որ հին ֆիլմի հեղինակն էլ նույն մարդն էր, ինչ նոր ֆիլմինն է:

Էհ, հետո ի՞նչ... «Փող ունես՝ աշխարհը ձեռքդ կհամբուրի»՝ նորից նույն միտքն է պտտվում նրա գլխում:

Բայց մի՞թե փողով ամեն ինչ կարող ես ձեռք բերել: Մի՞թե փողը կերջանկացնի քեզ, մի՞թե փողը կբուժի բոլոր այն վերքերը, որ մարդիկ հասցրել են քեզ, երբ դու դեռ սաղարթախիտ ծառ չէիր, այլ մի փոքրիկ թուփ: Նրա աչքի առաջ հառնում են մերօրյա «մեծապատիվ մուրացկանն